O'zbekiston Respublikasi Iqtisodiyot vazirligi, Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qo'mitasi, Fanlar akademiyasi, Tashqi iqtisodiy aloqalar, investitsiyalar va savdo vazirligi tomonidan tashkil etiladigan ushbu tadbir Prezidentimiz Islom Karimovning 2008 yil 15 iyulda qabul qilingan "Innovatsion loyihalar va texnologiyalarni ishlab chiqarishga tatbiq etishni rag'batlantirish borasidagi qo'shimcha chora-tadbirlar to'g'risida"gi qarori ijrosini ta'minlash doirasida o'tkazilmoqda, deb xabar qiladi O'zA.

Innovatsion yarmarkada vazirlik va idoralar milliy iqtisodiyotimizning barcha tarmoqlaridagi korxonalar, fermer xo'jaliklari, Fanlar akademiyasi tizimidagi ilmiy muassasalar, oliy o'quv yurtlari, ilmiy markazlar, tajriba-konstruktorlik tashkilotlari, shuningdek, xalqaro tashkilotlar vakillari ishtirok etadi.

Yarmarkada nafaqat yaratilgan texnologiyalar bo'yicha shartnomalar tuzish, balki real iqtisodiyot tarmoqlari vakillarini yangi g'oyalar va loyihalar bilan tanishtirish ham ko'zda tutilgan. Ularni amalda joriy etish uchun olimlar va xo'jalik yurituvchilar o'rtasida to'g'ridan-to'g'ri kooperatsiya aloqalarini o'rnatish, xomashyo va moliya resurslari, tajriba uchun ishlab chiqarish bazasi zarur. Yarmarka davomida o'tkaziladigan yangi g'oyalar va loyihalar taqdimotlari, davra suhbatlari, seminarlar bunday aloqalarni yo'lga qo'yishga xizmat qiladi.

O'zbekiston ulkan imkoniyatlarga, milliy iqtisodiyotning barcha tarmoqlari va ijtimoiy sohalarni innovatsion rivojlantirish borasida katta salohiyatga ega. Innovatsion g'oyalar, texnologiyalar va loyihalar respublika III yarmarkasi ilm-fan va ishlab chiqarish o'rtasida samarali kooperatsiya aloqalari kengayib borayotganini yana bir bor namoyon etadi.

Uzreport.com  11.01.2010 09:38:02